ASAKASAKAREO
Horakoraka
anjaran'ny akanga,
Kalokalo fanaom-boromanga,
F'asakasakareo tsy mitranga!
Dobodoboka
fomban'amponga,
Tabataba ny maro kilonga
F'asakasakareo tsy mba tonga!
Rodaroda
fanaon-dranotrambo,
Setrasetra no fomban'ny lambo;
Fa ny hanina anao tsy mba tambo!
Jononoka
ny erika an'ala,
Patrapatraka ilay patrakala,
Fenofeno ny lavi-malala!
Dinidinika
sisa lazaina,
Hafatrafatra anao sombinaina:
Hontsahontsa fa mani-maraina
NY AVANA